Home Sports திறமையை முழுவதும் வெளிப்படுத்தி இருந்தால் ஆட்டத்தின் போக்கு மாறியிருக்கும் – சேப்பாக் அணி வீரர் முருகன்

திறமையை முழுவதும் வெளிப்படுத்தி இருந்தால் ஆட்டத்தின் போக்கு மாறியிருக்கும் – சேப்பாக் அணி வீரர் முருகன்

42

வீரர்கள் தங்களது திறமையை முழுவதும் வெளிப்படுத்தி இருந்தால் ஆட்டத்தின் போக்கு மாறியிருக்கும் என சேப்பாக் சூப்பர் கில்லீஸ் அணி வீரர் முருகன் அஸ்வின் தெரிவித்துள்ளார். #CSGvKK #TNPL2018

சென்னை:

டி.என்.பி.எல். போட்டியில் நடப்பு சாம்பியன் சேப்பாக் சூப்பர் கில்லீஸ் அணி காரைக்குடி காளையிடம் தோற்றது.

சேப்பாக்கம் எம்.ஏ.சிதம்பரம் மைதானத்தில் நடந்த இந்த ஆட்டத்தில் முதலில் விளையாடிய காரைக்குடி காளை அணி நிர்ணயிக்கப்பட்ட 20 ஓவர்களில் 5 விக்கெட் இழப்புக்கு 193 ரன் குவித்தது.

கேப்டன் அனிருதா 28 பந்தில் 56 ரன்னும் (4 பவுண் டரி, 4 சிக்சர்), ஷாஜகான் 20 பந்தில் 43 ரன்னும் (2 பவுண்டரி, 4 சிக்சர்), பாப்னா 23 பந்தில் 31 ரன்னும் (2 பவுண்டரி) எடுத்தனர்.

அருண், ஹரீஷ் குமார் தலா 2 விக்கெட்டும், அலெக்சாண்டர் 1 விக்கெட்டும் எடுத்தனர்.

பின்னர் விளையாடிய சேப்பாக் சூப்பர் கில்லீஸ் அணியால் 20 ஓவர்களில் 6 விக்கெட் இழப்புக்கு 146 ரன்னே எடுக்க முடிந்தது. இதனால் காரைக்குடி காளை அணி 47 ரன் வித்தியாசத்தில் வெற்றி பெற்றது.

கேப்டன் கோபிநாத் அதிகபட்சமாக 38 பந்தில் 47 ரன்னும் (3 பவுண்டரி, 2 சிக்சர்), முருகன் அஸ்வின் 24 பந்தில் 33 ரன்னும் (2 சிக்சர்) எடுத்தனர். யோமகேஷ், மோகன் பிரசாத், ராஜ்குமார், லட்சுமணன், பாப்னா தலா 1 விக்கெட் எடுத்தனர்.

சேப்பாக் சூப்பர் கில்லீஸ் பெற்ற 3-வது தோல்வியாகும். திருச்சி வாரியர்ஸ், மதுரை பாந்தர்ஸ் அணிகளிடம் ஏற்கனவே தோற்று இருந்தது. இந்த தோல்வி குறித்து சேப்பாக் சூப்பர் கில்லீஸ் வீரர் முருகன் அஸ்வின் நிரூபர்களிடம் கூறியதாவது:-

காரைக்குடி காளை அணியின் கேப்டன் அனிருதா ஸ்ரீகாந்த் கடந்த போட்டியில் சிறப்பாக ஆடினார். இதனால் அவரை ‘பவர் பிளேயில்’ கட்டுப்படுத்த வேண்டும் என்று கருதினோம். அவர் மித வேகப்பந்து வீச்சில் நன்றாக ஆடுவார் என்பதால் தொடக்கத்திலேயே சுழற் பந்து வீரர்கள் பந்து வீசினோம். ஆனால் இந்த திட்டம் எடுபடவில்லை.

அணியில் திறமையான வீரர்கள் பலர் உள்ளனர். ஆனால் இக்கட்டான சூழ்நிலையில் எங்களால் வெற்றி பெற முடியவில்லை. ஒருவேளை எங்கள் திறமையை முழுமையாக வெளிக்காட்டி இருந்தால் ஆட்டத்தின் போக்கை நிச்சயம் மாற்றி இருப்போம்.

எங்களது பந்து வீச்சு சிறப்பாக அமையவில்லை. பந்து வீச்சு நேர்த்தியுடன் இல்லை.

தொடர் தோல்விகளில் இருந்து முழுமையாக மீண்டு அடுத்து வரும் போட்டிகளில் வெற்றி பெற முழு முயற்சி செய்வோம்.

இவ்வாறு அவர் கூறினார்.

சேப்பாக் சூப்பர் கில்லீஸ் அணி 4-வது ஆட்டத்தில் கோவை கிங்சை சந்திக்கிறது. இந்த ஆட்டம் வருகிற 26-ந்தேதி (வியாழக்கிழமை) நெல்லையில் நடக்கிறது.

காரைக்குடி காளை அணி பெற்ற 2-வது வெற்றியாகும். அந்த அணி 4-வது ஆட்டத்தில் திருச்சி வாரியர்சை 27-ந்தேதி எதிர் கொள்கிறது.

இன்று 2 ஆட்டங்கள் திண்டுக்கல் அடுத்த நத்தம் என்.பி.ஆர். கல்லூரி மைதானத்தில் நடக்கிறது.

மாலை 3.15 மணிக்கு நடைபெறும் ஆட்டத்தில் மதுரை பாந்தர்ஸ்- டூட்டி பேட்ரியாட்ஸ் அணிகள் மோதுகின்றன. மதுரை 2-வது வெற்றிக்காக பெற காத்திருக்கிறது. தூத்துக்குடி ஹாட்ரிக்‘ வெற்றி ஆர்வத்தில் இருக்கிறது.

இரவு 7.15 மணிக்கு நடைபெறும் 2-வது ஆட்டத்தில் திண்டுக்கல் டிராகன்ஸ்- காஞ்சி வீரன்ஸ் அணிகள் மோதுகின்றன. காஞ்சி வீரன்ஸ் முதல் வெற்றிக்காக காத்திருக்கிறது. திண்டுக்கல் அணி 3-வது வெற்றி ஆர்வத்தில் உள்ளது.#CSGvKK #TNPL2018